Монгол Улсын Ерөнхий сайдаар ахлуулсан 60-70 хүний бүрэлдэхүүнтэй нүсэр гэж хэлж болохоор баг өнгөрсөн долоо хоногт Бурхан Халдун уулыг зорьсон билээ. Ингэхдээ Ерөнхий сайд маань өөрийн хүү, ойр дотныхон төдийгүй дагалдагчдаа авч явсан аж. Улмаар уулнаас буцах замдаа төөрч, хоёр хоног сураг тасарч төрийг түргэн авхуулж, ард иргэдээ сандаргав. Хамгийн хачирхалтай нь Засгийн газрын тэргүүнийг яах гэж долоо биш 70 хүн дагаж явав. Ийм олон хүний бүрэлдэхүүнтэйгээр Бурхан Халдун уулыг зорих болсон шалтгаан нь чухам юу байв. Түүгээр ч зогсохгүй Цаг уур орчны шинжилгээний газрын Урьдчилан мэдээлэх секторын эрхлэгч Ж.Цогтыг төрийн түшээдийн амь нас, аюулгүй байдлыг анхаарч ажиллах ёстой Төрийн тусгай хамгаалалтын газарт цасаар шуурч, хүйтэрнэ гэдгийг хэлж, мэдэгдсээр байтал багийн бүрэлдэхүүнийг замд гаргасан ямар зорилготой юм гэх олон олон асуулт хариулт нэхнэ. Мөн Засгийн газрын тэргүүнийг 70 шахам дагалдагчтайгаа ууланд төөрч будилж, амь нас нь дээсэн дөрөөн дээр дэнжигнэж, аврал эрэн хашгирч байхад төрийн тусгай хамгаалалтын газрынхан юу хийж байсан нь өөрийн эрхгүй сонирхол татна. Эх сурвалжийн мэдээлж буйгаар төрийн тусгай хамгаалалтынхны хаана ч холбоо барьж байх ёстой станц нь ажиллаагүй гэх. Үнэн хэрэгтээ уг станц нь ажиллаагүй биш төөрч будилсан ч дохиолол өгч, холбогдох байсан юм биш үү. Харин Ерөнхий сайдыг дагалдаж явсан 70 нөхөр бүгд түүнээс албан тушаал горьдсон, авсан нөхөд болж таарлаа.
Тийм биш аваас тэд яах гэж Ерөнхий сайдад тал засч, галууг дуурайж хэрээ хөлөө хөлдөөхийн үлгэрээр утсан чинээ улаан амиа жингийн туухай дээр дэнсэлж үзсэн болох вэ. Яах гэж цаг агаар цастай, догшин байхыг сануулсаар байтал Бурхан халдун уулыг зорьж, нүүр нүдгүй балбах цасан шуурганд төөрөх гэж.
Хэрэв ууланд төөрч бүгсэн Ерөнхий сайдын багийнханыг 0252 дугаар ангийн хилчид олж авраагүй бол тэдний амь нас, ирээдүй цаашаа яаж хөврөх байсан бол. Улмаар хоёр хоноод олдохгүй байсан бол ард нь үлдсэн хэчнээн олон гэр бүл өнчирч, хэдий болтол шаналах байсныг төсөөлөхөд ч бэрх санагдана. Тиймээс Засгийн газрын тэргүүн Н.Алтанхуяг 70 хүний амь насыг аюулд оруулж, ар гэрийнхнийг нь гашуун зовлонд унагаах шахсаныхаа төлөө огцрох ёстой гэж ард иргэд үзэж байгаа бололтой.
Мөн Сэлэнгэ мөрнөөр урсаж одсон ээж хүү хоёр руу нисдэг тэрэг явуулсан бол ядаж тэр жаахан амьтан ижийтэйгээ амьд гарах байсан хэмээн халаглаж байна. Түүнчлэн Ерөнхий сайд Н.Алтанхуяг болон түүнийг дагалдан явсан 70 хүний амь нас, аюулгүй байдлыг хамгаалж, хайрлаж чадаагүй, тэрхүү арга техникийг боловсруулж хүчрээгүй Төрийн тусгай хамгаалалтын газрын даргыг үүрэгт ажлаас нь чөлөөлөх бололтой.
Эх сурвалж: Өглөөний сонин
