 Урьд цагт сахал хусахад зориулсан хөөс, дараа нь түрхдэг ус хоёроос өөр гоо сайхны бүтээгдэхүүн хэрэглэдэггүй байсан эрчүүд маань одоо олон төрлийн тансаг ус тос хэрэглэх боломжтой болжээ. Арьс цэвэрлэх, чийгшүүлэх, үрчлээ арилгах, тэжээл өгөх, нарнаас хамгаалах тос гээд эрчүүдэд зориулсан 5000 гаруй нэр төрлийн гоо сайхны бүтээгдэхүүн бий.
Эрчүүдийн гоо сайхны хэрэглээний зах зээл ч сүүлийн үед хүчээ авч байна. Германы эрчүүд гэхэд л өнгөрсөн жилд 610 сая еврог гоо сайхандаа зориулжээ. Яагаад тэдэнд эмэгтэйчүүдийнхээс өөр гоо сайхны тос хэрэгтэй вэ? Эрчүүдийн арьс тослог ихтэй. Эрэгтэй хүний арьсны тослогийн хэмжээ эмэгтэйчүүдийнхээс хоёр дахин их. Гоо сайхны тосон бүтээгдэхүүний гол орц нь тос, ус хоёр байдаг. Эмэгтэйчүүдийн гоо сайхны бүтээгдэхүүний орц нь 50% ус, 50% тос байдаг бол эрчүүдийн арьсны онцлогоос болоод 80% ус, 20 % тос байдаг байна. Тэгэхээр эрчүүдэд зөвлөхөд эхнэрийнхээ тосноос бүү түрхээрэй. Эмэгтэйчүүдэд зориулсан тос тослог ихтэй, арай өөр найрлагатай байдаг тул эрэгтэй хүний арьсанд тохирдоггүй бөгөөд зарим тохиолдолд үрэвслүүлдэг байна. Тиймээс эрчүүдэд зориулсан тос хэрэглэх нь зүйтэй. Эрчүүдийн арьс үрчлээтэх нь бага. Эрэгтэй хүний арьс эмэгтэй хүнийхийг бодоход 20 хувь зузаан байдаг аж. Эвэрлэг бүрхэвч нь 20 хувиар их. Арьс нь каллоген ихтэй. Тиймээс эмэгтэй хүний арьснаас 15 жилийн дараа үрчлээтэж эхэлдэг. Гэхдээ тэр үрчлээ нь эмэгтэй хүнийх шиг олон жижиг бус харин хэдэн гүн урт үрчлээ болж тогтдог юм байна. Эрчүүдийн арьс нэг хөгширвөл хурдан хөгширдөг. Арьсаа цэвэрлэх зөвлөмж Тос түрхэж арчлахаасаа өмнө заавал нүүрээ цэвэрлэх нь чухал. Өдрийн цагаар тоос шороо, тос хөлс, бактери нүүрэн дээр цуглаж нүүрний арьсны хөлсний нүхнүүдийг бөглөдөг тул унтахаасаа өмнө нүүрээ угаах хэрэгтэй. Гэхдээ зөвхөн усаар угаавал хангалттай биш. Нүүрний зориулалттай шингэн савангаар угааж дараа нь нүүрний саванг усаар сайтар зайлж арилгах хэрэгтэй. Нүүрний ус түрхэх нь хэт чамирхах асуудал гэж зарим хүн ойлгодог. Гэвч энэ нь нүүрээ цэвэрлэсний дараа заавал хийх ёстой үйлдэл юм. Учир нь энэ нь нүүрний арьсан дээр үлдсэн савангийн үлдэгдлийг арилгаж, арьсны байгалийн бүрхэвчийг нөхөж өгдөг ба арьс эрт хөгшрөхөөс хамгаална. Нүүр арчдаг хөвөнд усыг шингээж арчих нь ердөө л 15-30 секундийн ажил шүү дээ. Нүүрний ус етанолтой, етанолгүй гээд олон янз байдаг. Харин хуурай болон мэдрэмтгий арьстай хүнд етанолгүй ус хэрэглэх нь зохимжтой. Үүний дараа тосоо түрхэж таны нүүрний арчилгаа бэлэн болно. Пийлинг (peeling ) буюу үхмэл арьсыг гуужуулах Нүүрний арьс 14 хоног тутам шинэчлэгдэж, нөхөн ургадаг. Хуучин үхмэл арьсыг хоёр долоо хоногт нэг удаа хуулах хэрэгтэй. Үүнд зориулсан дотроо жижигхэн бөмбөлөг агуулсан эсвэл ургамлын үрийг маш нарийн нунтаглаж хийсэн тусгай гуужуулагч тос байдаг. Ингэснээр арьсны гадаргуу зөөлөн болдог. Үүнийг сахал хусахаасаа өмнө хийхгүй бол хорсдог. Эрчүүдэд зориулсан баглаа Хэдэн жилийн өмнө эрэгтэй хүнийг тусгай гоо сайхны бүтээгдэхүүн хэрэглэдэг гэвэл сонин сонсогддог байв. Гэвч өнөөдөр энэ нь зайлшгүй зүйл болж эрэгтэйчүүдийн гоо сайхны бүтээгдэхүүн бие даасан салбар болон хөгжжээ. Эрчүүдийн гоо сайхны бүтээгдэхүүн нь ихэвчлэн бараан өнгийн сав боодолтой. Хэлбэр нь гал асаагч, халаасанд авч явдаг архины сав шиг жижигхэн гэх мэт эрчүүдийн онцлогт тохирсон байдаг. Гэхдээ гаднах “засвар үйлчилгээнээс” гадна нойр хоолоо тохируулж, эрүүл мэнд, сэтгэлийн жаргал арьсыг хамгийн ихээр гэрэлтүүлж байдаг гэдэгтэй та санал зөрөхгүй биз ээ.
Newer news items:
Older news items:
|
