 Төрсөн газар: Улаанбаатар хот, I төрөх газар. Багын мөрөөдөл: Эмч болох. Ажил бүтээл: Гэрлэх ёслолын ордны даргаар 17 жил ажиллаж байна.
Бахархал: Монголоороо, үзэсгэлэнт байгалиараа. Гэр бүлийнхнээрээ. Төрийн болон төр засгийн ямар тодорхой бодлого, төслийн үр дүнг та хамгийн түрүүнд мэдэхийг хүсэж байна вэ, яагаад? - Улс орноо, хоёрхон сая хүнийг яагаад зөв жолоодож чаддаггүй, тулга тойроод, хоорондоо хардалцдагийг үзэн яддаг. Биширдэг түүхэн хүн тань? - Зохиолч Л.Түдэв, Цэдэнбал-Филатова. Уншсан номуудаасаа гурвыг магтвал… - Шинкарев “Цэдэнбал,Филатова хоёр” Л.Дашням “Монголчуудын хүн бүтээдэг эрдэм” Прус Болеслав “Фараон I-III” П.Ихбаяр “Амьдрал хайрлахуйн өврийн ном” Та багадаа хэн шиг болохыг хүсдэг байсан бэ? - Бага ангийн багш шигээ болохыг хүсдэг байсан. Өөрийнхөө юунд дургүй вэ? - Зарим асуудалд ухрах үе гаргахдаа. Та юугаараа бусдаас онцгой санагддаг вэ? - Онцгойрох чанар байхгүй. Бусадтай адил гэж боддог. Таныг чухам юу урагшлуулж байдаг вэ? - Өмнөө тавьсан зорилгодоо хүрэхийн тулд цаг хугацаа бүртэй уралддаг. Өөрийнхөө ямар амжилтаар бахархдаг вэ? - Нэг л шийдсэн бол заавал хийж дуусгадаг чанараараа. Нийгмийн тусын тулд олон нийтийн үйл ажиллагааг амжилттай удирдаж чаддагаараа. Алжаалаа яаж хамгийн сайн тайлдаг вэ? - Салхинд гарах. Найзуудтайгаа ярилцаж суух. Ямар дуу дуулах дуртай вэ? - “Номин талст” хамтлагийн дуучин Дэлгэрмөрөнгийн “Хань”, “Тэнгэрийн бүсгүй”, Эрдэнэбат “Гэртээ ирлээ”. Амьдралд сургамжтай үг хэлээч... - “Хүмүүсийг хайрлаж чаддаг байх Хэлсэндээ хүрдэг байх Зорилготой байх. Чармайлт гэж юу вэ? - Биеэ дайчлахыг хэлнэ. Чаддаггүй, мэддэггүй зүйлдээ мэргэн байх дургүй. Хоёр дахь оршин суух газраа сонго гэвэл… - Хотоос холхон байгалийн үзэсгэлэнт газарт амьдрах. Өөрийгөө хэн нэгэнтэй нэг сар соль гэвэл... - Хэн ч байсан солино. Хамгийн гол нь юуг ч хийж чаддаг хүн байхыг шаардана. Таны хамгийн сайн хийж чадах хоол? - Өдөр болгон өөр өөр хоол хийх дуртай “Гурилтай шөл”. Хэзээ хийсэн, ямар наймаанд сэтгэл тань хангалуун байдаг вэ? - Өөртөө таалагдсан гуталд үнэ хайрладаггүй. Алгасалгүй үзмээр нэвтрүүлэг... - Гэрэлтэй цонх, Реалити шоу, Ням гаригийн зочин. Зохиолч, яруу найрагчдын ухаарал хайрласан шүлэг, бүтээлээс алийг нь санаж явдаг вэ? - Бямбын Ринчен: Амраглах гэгч анхны ёс Мэндлэх гэгч мөнхийн ёс Биеэ мэдвэл хүн Бэлчээрээ мэдвэл мал О.Дашбалбар: - Амьд явахыг би бусдад хайраа түгээхийн нэр гэж бодном Аз жаргалыг би бусдаас хайр хүлээхийн нэр гэж ойлгоном. Та ямар нэгэн юмнаас залхаж байна уу. Тийм бол юунаас? - Сонгуулийн шоунаас. Нэр дэвшигчдийн синдромоос. Хүмүүс таны талаар юу гэж ярьдаг бол? - Ихэнхдээ магтдаг Яг л нэг сайхан ээж хүн дээ гэдэг. Таалагддаг жүжигчин (гадаад байсан ч болно) - Н.Сувд, Мягмарнаран. Уран бүтээлийн ямар тоглолтыг мөнгө гамналгүй үзэх вэ ? - Бүх төрлийн ардын болон сонгодог хөгжмийн нэгдсэн тоглолтыг. Мөрөөдлийн тань машин? - Байхгүй. Хэн нэгнийг шагнах болбол хэнийг ямар үндэслэлээр шагнах вэ? - Ажилдаа үнэнч, бусдыг хүндэлж чаддаг, хэнээр ч хэлүүлэлтгүйгээр хийх ёстой зүйлээ хийчихдэг, сэтгэл сайхан хүнийг шагнах дуртай Аливаад хандах хандлага нь сэтгэлээсээ байвал баярладаг. Гадаадын хүнд эх орныхоо сайхны тухай хамгийн товчоор яаж ойлгуулах вэ? - Хүн чанар: үр хүүхдээ хүндэтгэж тэднийхээ төлөө яахаас ч буцдаггүй хүмүүс шүү.
Newer news items:
Older news items:
|
