Бидэнд дадал болж хэвшээгүй амьдралын хэв маяг, этгээд зан хэтэрхий гэмээр задгай хувцаслалт хэзээнээсээ л содон байсаар ирсэн. Содон сонин гэхээсээ илүү манайхан эвэртэй туулай үзсэн юм шиг эгдүүцэн хүлээн авдаг байсан үе бий. Нэгэн хэвэнд цутгасан мэт яг адилхан хүмүүсийг өмнөх нийгэмд талх шиг л үйлдвэрлэдэг байж. Бат гуайн хүү, Доржийн хүү хоёрын сурдаг сургууль, өмсдөг хувцас, тэр ч байтугай хүсэл мөрөөдөл нь хүртэл ойролцоо байлаа. Амьдарч буй нийгэм нь “хайрцаг” доторх шиг хязгаартай байснаас тэр. Өнөөдөр харин цаг өөр болсоон.

Мөнгө нь байвал бид хүссэн үедээ л хилийн дээс алхаж байна. Интернэт гэгч ертөнцөд нэвтрээд дэлхий хаанаас ч хамаагүй мэдээлэл шүүрдчихнэ. Бидэнд тийм эрх нь нээлттэй бий. Тэр хэрээр бид өмсөх зүүх, идэх уухаа өөрсдөө сонгож, мөн хүсэл мөрөөдөл минь ч хүрээ хязгааргүй болсныг хүлээн зөвшөөрөхөөс арга­гүй. Гэхдээ өмнөх нийгмийн улбаа ор тас арилчихаагүй ээ.

  Гудамжинд хаа нэг таарах рокеруудын араас өөрийн эрхгүй эргэж хардаг нь гэм биш зан. Үсээ урт ургуулж, хар савхиар дэгжир­хэж, энд тэндээсээ төмөр гинж санжгануулсан энэ залуус мэдээж өөрийн сонгосон замаар, үзэл бодолдоо үнэнчээр амьдарч яваа. Манай зарим урлагийнхан бас содон хувцасладаг л даа. Эрх чөлөөт нийгэм ийм боломж олгосон хэрэг шүү дээ. Тэр байтугай халуун зунаар нүцгэн цээж, нүүр толгойгоо шавраар будчихаад гудамжаар алхаж яваа уран бүтээлчтэй хэдэн жилийн өмнө таарч байснаа саналаа. “Цэнхэр нар” орчин үеийн урлагийн галерейн зураач тэр эрхэм хүмүүсийг гайхашралд оруулж буйгаа урлагийн нэг шинэ төрөл хэмээн тайлбарлаж байсныг санаж байна. “Хэн намайг юу гээд хэлчих бол”, “За яршиг аа, ингээд хувцаслачихвал өнөөх чинь галзуурчихаж гэнэ биз”, “Намайг үсээ шараар будуулчихсан байхыг чи зүүдэндээ л олж харах байх” ч гэдэг юм уу, энэ үгэндээ баригдаж, хүссэнээрээ, зоргоороо амьдарч чадахгүй яваа хүн магадгүй олон ч байж болох. Эрх чөлөө гэдэг ойлголтыг ийм жижигхэн зүйлээр тодорхойлох нь өрөөсгөл. Гэхдээ л тухайн хүний дотор ямар ертөнц байгаа нь хувцаслалт, хэлж ярьж байгаа үг болоод амьдралын хэв маягаас нь яах аргагүй л анзаарагддаг шүү дээ. Тэгвэл бидний энэ айж, ичдэг, гайхан цочирддог, муухай, заваан юм хэмээн үздэг бүгдийг өөрийн имиж болгон, өөрөөр хэлбэл нийгэмд тогтсон ёс жаягийн эсрэгээр амьдарч, олонд танигдан гарч ирсэн хүн бол Мадонна юм.

  Америкийн иргэн, католик шашинтай жирийн нэгэн айлын охин хэрхэн өөртөө тэсрэлт хийж, агуу амжилтын эзэн болсон талаар энэ удаагийн хавтасны сэдэвт өгүүлэх юм. Мадонна бол хэдэн саяар тоологдох фэнтэй, охид бүсгүйчүүдийн үлгэр дуурайл болсон, дэлхийн хамгийн баян эмэгтэйчүүдийн нэг юм. Түүний туулж өнгөрүүлсэн амьдрал, алдаа оноо болгон нь оргил өөд өгсөх шат болж байжээ. Өдгөө тэр 51 настай. Гэвч тэрээр тайзан дээр од болон гялалзсаар л байна. Хувийн амьдралдаа ч ялгаагүй, өөрөөсөө хоёр дахин дүү залуутай жиг ургуулж, дэлхийн хэвлэлийнхнийг завгүй байл­гасан хэвээр.

  Мадонна бол ербусын эрч хүчтэй, гал цогтой, гайхамшигтай эмэгтэй гэдгийг дэлхий нийтээрээ хүлээн зөвшөөрдөг. Манайхны од гэдэг ойлголт жинхэнэ утгаараа энэ агуу дуучинд л өгөх тодотгол юм гэдгийг түүний уйгагүй хүч хөдөлмөр, бүтээл зүтгэлээс харагддаг. Тэр үлгэн салган, сул дорой амьдраагүй, тэм­цэж, хөдөлмөрлөж байж зорьсондоо хүрчээ. Тиймдээ ч түүний амьдрал намтар тэр чигээрээ адал явдалт кино шиг ажээ. Иргэншсэн нийгмийн үлгэр дууриал болсон төлөөлөл, бидний огт төсөөлж ч байгаагүй тийм амьдрал, түүхийн эзэн Мадоннагийн ертөнцөд тавтай морил.

  Мадонна бол эмэгтэй хүний цог жавхаа, эрч хүч, дайчин зан чанарыг жинхэнэ утгаар нь харуулж чадсан уран бүтээлч бүсгүй юм. Тэрээр бага байхын л “Миний мөрөөдөл бол зөвхөн минийх. Миний ирээдүй болоод цаашдын ажил амьдрал ямар байх нь надаас л шалтгаална” гэж хэлдэг байжээ. Тийм ч учраас тэр бусдын хөл тавиагүй цоо шинэ замаар явсан юм.

  Мадонна жижиг том гэлтгүй тоглолт бүртээ цоо шинэ имиж төрхтэй­гээр үзэгч фэнүүдтэйгээ уулздаг байлаа. Улаан үстэй галзуу хүүхэн, төмөр зүүсгэл бүхий улаан рок, сонгодог загварын даашинзаар гоёсон эртний сурвалжит хатагтай, гэнэн томоогүй охин гээд тайзан дээр түүний бүтээсэн олон дүрийг фэнүүд нь өдгөө ч санаж байгаа. Эмэгтэй хүний байж болох бүхий л дүрд хувирч, маш олон талаас нь өөрийгөө харуулж чадсанаараа тэр урлагт жинхэнэ хувьсгал хийсэн юм. Хэзээ ч тэр нэг имиждээ үнэнч байгаагүй. Тэр ч байтугай, хүйсийн ялгааг халж, насны болон соёлын хил хязгаарыг давж гарч чадсан ховорхон авьяастан. Хэн ч түүн шиг тайзан дээр дахин “төрж” байгаагүй юм. Тэр тусмаа 50 насны босгыг элээчихээд шүү. Энэ бүхний гол нууц нь түүний дахин давтагдашгүй хувийн стильтэй холбоотой. Стиль гэдэг бол зөвхөн моодтой холбогддог эд биш. Энэ бол төрх байдал, үзэл бодол, хувь хүний чанар болон амьдралын хэвшил юм.

  Мадонна мундаг дуучнаас гадна бүжигчин, шоу менежер, жүжигчин, хөгжимчин гээд аль ч дүрд хамгийн сайн тоглож чадна. Түүний ямар агуу болох нь зөвхөн юу чаддаг бүхнийх нь нийлбэрээр илрэх төдий бус. Өөрийн авьяасыг хэрхэн хослуулж, дэлгэн харуулж, үүн дээрээ дөрөөлөн цааш хөгждөг онцгой арга барил дээр л түүний гайхалтай чадвар тогтож байдаг.

  Олны өмнө санаанд ормооргүйгээр хувьсан өөрчлөгдөж, сюрприз барьдаг Мадоннагийн энэ чанар яах аргагүй хувийн амьд­ралтай нь холбоотой. Түүний хүүхэд ахуй, өсвөр насны амьдрал ихээхэн зөрчил дунд өнгөрсөн нь ч түүнд нөлөөлсөн байж мэдэх юм. Дэлхийд “данстай”, Мадонна гэгч энэ дуучин ямар гэр бүлд өсч, ямар замыг туулж, өнөөдрийн энэ оргилд хүрсэн тухай сонирхолтой түүхийг танд дэлгэж байна.

  “Эмээ минь намайг багад хөвгүүдээс холхон байж, исүст сүсэг­лэн дуулгавартай байхыг захидаг байлаа. Эмэгтэйчүүдийн тухайд би онгон охин, янхан гэсэн хоёр ойлголттой л өссөн” хэмээн Мадонна хүүхэд насаа дурссан байдаг. Тун ялихгүй өчүүхэн жаахан нөхцөл байдал түүнийг эсэргүүцэн тэмцэхэд хүргэдэг байсан боловч зарим үед хувь тавилан түүнд тун өгөөмөр загнадаг байлаа. Хүүхэд насных нь дурсамжууд, түүний таахын аргагүй хурц ааш зан нь уран бүтээлд нь ч их нөлөөлсөн гэдэг. Цэвэр ичимтгий, даруу төлөв байх гэсэн тогтсон ёс заншлыг орвонгоор нь эргүүлдэг зан нь энэ үеэс үүдэлтэй. Өөрөөр хэлбэл тэр болохгүй гэж анхааруулсан хаалттай бүхэн рүү тэмүүлдэг байлаа. Мадонна Луйс Чиконэ 1958 оны наймдугаар сарын 16-нд Мичиган муж улсын Мэй Ситид төржээ. Тэдний гэр бүл тус хотод айлчилж явах үеэр тэр мэндэлсэн ажээ.

Эцэг Тони нь итали гаралтай бөгөөд тухайн үед автомашины алдарт компани “Крайслер”-т инженерээр ажилладаг байв. Ээж нь канадын франц гаралтай. Мадонна хоёр ах, гурван дүүтэй. Бараг хөлд орж ярьж эхлэхээсээ л тэр аав, ээжийн хайртай охин болж ямагт бусдын анхаарлын төвд байдаг байлаа. Өөрөө ч үргэлж гол дүр байх гэж мэрийж эхэлжээ. Ширээн дээр гарч дуулж бүжиглэж, дотоожоо цухалзуулж харуулах, зориуд өөрийгөө өвтгөж өрөвдүүлэх, шийтгүүлэхийн тулд ямар нэг хэрэг тарих, ах дүү нарынхаа тухай янз бүрийн хов тараах, сахилгагүйтэх зэргээр бяцхан Мадонна олны анхаарлыг татах бүхий л аргыг сүвэгчилдэг байв.

Хожмоо ч уран бүтээлчийн хувьд энэ зангаа тавиагүй. “Би үеийнхнээсээ их өсгөлүүн биетэй, аальгүй охин байсан” гэж 1989 онд ярилцлага өгөхдөө тэр хэлжээ. “Тэр маш түрэмгий, хүссэнээ биелүүлэх гэж зүтгэдэг, санасандаа ч хүрдэг байсан. Гэхдээ их өр зөөлөн, бидний төлөө байнга санаа тавина. Босс болж тоглох дуртай байсан“ гэж Мадоннагийн дүү Кристофер нь дурсчээ. Мадонна өөрийн найз негр охидынх шиг үсээ янзалж чадахгүй байгаадаа их бухимддаг байсан гэнэ. Найзуудаараа дамжуулан соул хөгжмийн урсгалтай танилцжээ.

Аав нь хатуу сахилга бат шаарддаг, хүүхдийнхээ боловсролд ихээхэн анхаардаг хүн байсан агаад “Аав минь тийм хатуу байгаагүйсэн бол би өдийд ийм амжилтанд хүрэхгүй байсан” гэж Мадонна ярьдаг.

Түүний гэр бүл католик шашинтай байсан бөгөөд төрсөн цагаас нь шашин шүтлэг хэмээх том хүлээс түүнийг тойроогүй юм. Гэхдээ тэрээр энэ талаар тун этгээд бодолтой явдаг байлаа. “Шүтлэг, дур хүсэл хоёр хоорондоо нарийн холбоотой, сүмд очоод л би нүцгэн эр хүн /цовдлогдсон есүс/ анх харсан. Эротик мэдрэмж тэгэхэд анх төрсөн. Би бурханд итгэдэг. Би католик шүтлэгийн гол санааг магадгүй орхиогүй байх, онолыг нь харин хаясан” хэмээн хожим ярьжээ. Мадонна таван настайдаа католик сургуульд анх орсон байна. Гэтэл сургуулийнх нь хандмаанууд их таалагдаж, Хандмаа болох хүсэлтэйгээ нэг биш удаа аавдаа дуулгав. Эцэг нь зөвшөөрөөгүй бөгөөд харин хүүхдүүддээ ямар нэг хөгжим дарж сурахыг шаарддаг байжээ. Мадонна төгөлдөр хуур сурч эхэлсэн боловч жилийн дараа аавыгаа ятгаж байгаад бүжиг заалгахаар шийдсэн байна. “Миний нүд аавынхыг дуурайсан харин инээхдээ намайг ээжтэйгээ адилхан гэдэг байлаа. Аав минь мундаг хүн байсан. Бидэнд ямар нэг зүйл хориглосон л бол өөрөө ч бас хэрэглэдэггүй. Ийм хүчирхэг зан чанартай аав миний хувьд шүтээн минь байлаа. Намайг зургаатай байхад ээж минь хөхний хорт хавдраар өвдсөн. Энэ хар мэдээг дуулаад нэг л хоосон оргиод явчихаж билээ. Тэгээд энэ хоосон орон зайгаа дүүргэхийн тулд сайн дүн авч шилдэг сурагч болохоор шийдсэн. Хэрвээ би энэхүү хоосон байдлыг мэдрээгүйсэн бол зорьсондоо хэзээ ч хүрэхгүй байсан. Үгүйдээ л тэмүүлэл бага байх байсан гэж боддог. Нэгэнт ээжгүй болох учраас би заавал хүчирхэг хүн болох ёстой. Үүний тулд өөрийнхөө төлөө зүтгэх хэрэгтэй гэдгээ ойлгосон” хэмээн Мадонна ярьсан байдаг.

Хүчирхэг эмэгтэй болохын төлөө эргэлт буцалтгүй шийдсэн тэр жаахан охин зорьсондоо хүрч чадсан бөгөөд өнөө хэр нь ээжийгээ үгүйлсээр байгаа нь “Oh father” клипнээс нь харагддаг. Ээжээсээ хойш тэрээр дүү нараа өсгөхөд ихээхэн үүрэгтэй оролцох болжээ. Гэтэл аав нь тэдний гэрийн үйлчлэгч эмэгтэйтэй гэрлэсэн нь түүнд маш хүнд цохилт болжээ. Аавдаа гомдож, зарим үед үзэн яддаг болж, тэр үеэс Мадонна хувийн стильдээ ихээхэн анхаарч эхлэв. Өнгө өнгийн эрээн мяраан хувцас өмсөж, зориуд түүндээ нүх гарган дэгжирхэж, өөрийнхөө хийсэн боолтоор үсээ боох болжээ. Дахин хоёр ч дүү нь мэндлэв. Тэгэх тусам л аавдаа улам их уурлаж, тэр хэрээр улам задгай болж аавыгаа бухимдуулан янзыг нь үзэх гэдэг болов.

11-тэй охин нь дотоож, хөхөвчнөөс өөр хувцасгүй, нүүр амаа, бүр биеэ хүртэл будчихсан, үсээ сэгсийлгэн сургуулийн тэмцээн дээр бүжиглэж байхыг хараад аав нь маш их цочирджээ. Мадонна даруухан хувцаслаж гэрээсээ гараад аавынхаа нүднээс далд ормогц банзлынхаа хормойг дээш шуун дотоожоо харагдахаар болгон эргүүлж, шилэн оймс өмсөн, гадуур хувцасныхаа дотуур биеэ барьсан цамц өмсдөг байжээ. Тэгээд хичээлээ тармагц диско клубт очиж галзуу юм шиг бүжиглэнэ. Тэр бүгдээс түрүүнд, дур булаам, онцгой содон, аазгай хөдөлгөсөн байхыг хүсч байлаа. Гэхдээ тэр ямар нэгэн сексийн сонирхолгүй байв. Тамхи татаж, нүд амаа будаж, богино банзал, цээживч өмсөх гэхчилэн аавынхаа хориглосон бүхнийг тэр хийж эхлэв. Тэр ч бүү хэл дэлгүүрийн лангуунаас хааяа хулгай хийчихдэг болов. Энэ үедээ тэр анх удаа нэгэн хүүд сэтгэл алдарчээ. “Ронни гайхалтай сайхан хүү байсан. Цамцаа тайлж хаячихаад би сургуулийн гадуур түүнийг хайгаад гүйчихдэг байлаа. Ямар нэг юманд татагдах, хэн нэг хүнд сайн байх нь надад их чухал байсан юм. Би хэн нэгэн шиг болмоор байлаа. Тиймдээ ч би хориглосон бүхнийг хийхийг хүссэн” гэж Мадонна дурсчээ.

Сүмийн сургуулиас дунд сургуульд шилжиж ирээд удалгүй тэр сургуулийнхаа тэргүүний сурагч болов. Хичээлдээ маш их мэрийж, хажуугаар нь олон нийтийн ажлыг ч орхигдуулсангүй. Сургуулийнхаа хөгжөөн дэмжигч багийн гишүүн болж, бүжгийн хичээлд явж, жүжигт тоглодог болов. Жүжгийн сургуулилт дээр ч хичээлийн дараах арга хэмжээнд ч тэр улам л задгай хувцаслаж, биеэ авч яваа байдал нь хүртэл этгээд байх болов. Түүний 15-тай байх үеийн найз хөвгүүн нь “Биднийг секс хийсэн гэдгийг хүмүүс мэдэх вий гэхээс тэр ердөө ч болгоомжлоогүй. Бусад охид нуудаг байхад тэр харин ч үүгээрээ бахархаж байлаа” гэж хожим ярьжээ. “Надад хэн нэгэн хөвгүүн таалагдвал би шууд л яваад очдог байлаа. Анх учирсан хөвгүүнтэйгээ би удаан найзалсан. Гэвч намайг завхай, янхан гэж доромжилж, тэгээд бид салсан. Түүний хэлж байсан үгс одоо ч чихэнд минь сонсогдож байна. Намайг хүүхэд байхын л үеийнхэн маань ингэж хэлдэг байсан. Тэгээд ч сургуульд би нэг л тохирохгүй хүн шиг санагддаг байсан” хэмээн алдарт дуучин дурсаж байна.

Тэр энэ үеэс бүжиглэж эхэлжээ. Бүжгийн багш Флинн түүний амьдралд онцгой нөлөөлжээ. Мадонна галбираа хадгалахын тулд хоолны дэглэм сахих болж, бүжигтээ илүү анхаарахын тулд Хөгжөөн дэмжигчдийн багаасаа хүртэл гарчээ. “Флинн бол надтай тааралдсан анхны уран бүтээлч хүн байсан. Надад бүжиг заагаад зогсохгүй хааяа музейгээр дагуулж явна. Тэр бас миний хүмүүжүүлэгч, аав, ахыг минь орлохуйц, намайг хамгийн сайн ойлгодог хүн байлаа” хэмээн Мадонна ярьсан байдаг. Хожим түүний анхны багш Флинн “Мадонна бол бүжиг сурах гэж үнэхээр их тэмүүлсэн, цатгахын аргагүй цангачихсан хүүхэд байсан” гэж ярьжээ. Тэрээр Мадоннагийн авьяасыг анх таньж урлагийн замд нь чиглүүлж өгчээ. Мадонна амжилттай сайн дүнтэй суралцсан тул дунд сургуулиа 17 настайдаа урьдчилан төгсчээ. Флинн Мичиганий их сургуульд бүжгийн профессороор уригдаж, Мадонна ч түүнийг даган сурахаар явав. Мадонна мөн л бусдаас содон оюутан байлаа. Бусад охидоос ялгарахын тулд шилэн оймс өмсөж, нимгэн өмдөө ураад хавчаараар тогтоодог байв. Харин хоёрдугаар курст байхдаа тэрээр гэнэтхэн сургуулиа орхихоор шийджээ. Хэдийгээр бүжгийн сургуульд суралцаж байсан ч тэрээр илүү нэр алдар, карьер хөөхийн тулд томоохон хотод очиж өөрийгөө сорихыг хүсчээ. Багш Флинн нь ч гэсэн түүнийг дэмжжээ.

Нью-Йорк руу явахдаа тэрээр халаасандаа 35-хан доллартай, хэдэн бүжгийн хувцас, мөн “аз дагуулагч” хэмээн ээжийнхээ жаазтай зургаас өөр эд хогшил гэх зүйлгүй байлаа. Энэ үеийнхээ дурсамжийн талаар Мадонна “Мөнгөгүй ч яаж ийгээд аргалаад амьдрах сайхан байж дээ. Зарим үед хэцүү л байсан. Тэр үед би уртхан амьсгаа аваад, шүдээ зууж, нулимсаа залгиад л “Би чадна, би чадах ёстой. Тэгэхгүй бол би хаачих юм бэ” гэж өөртөө хэлдэг байлаа. Линкольн төвийн худгийн дэргэд суугаад уйлдаг байлаа. Бяцхан тэмдэглэлийн дэвтэртээ бичээд ганц ч болов найзтай болохыг гуйж залбирдаг байлаа” хэмээн ярьжээ. Мадонна Нью-Йоркт ирээд мөнгө олохын тулд янз бүрийн л ажил хийв. Зургийн сургуульд модель болж хүртэл үзэв. Кафед 1 доллар 50 цент авдаг байсныг бодоход энэ ажил нь 10 долларын хөлс өгдөг байв.

1979 оны хавар Мадонна “Breakfast club” хамтлагийн дуучин Ден, Эд гэх ах дүү хоёртой танилцсанаар дуучин болох мөрөөдлийнх нь эхлэл тавигджээ. Тэрээр удалгүй тус хамтлагт дуулж, бүжиглэж, мөн гитар дардаг болов. Ах Бентэй нь тэр үеэс үерхэж эхэлжээ. Мадонна тайзан дээр ёстой л өөрийн дураар байдаг байлаа. Өмнө нь хэн ч түүн шиг ширээн дээр гаран бүжиглэж, үзэгчид рүү оргилуун дарс буудуулж, галзуу хүн шиг аашилж байсангүй. Тэр үнэхээр бусдыг гайхашруулж чаддаг байлаа. Бага багаар хүмүүст танил болж эхлэв. Хэд хэдэн диско клубүүдэд дуулж, хөгжимдөж, заримдаа дууны үг хүртэл бичиж өгдөг байж. Мөн зургийн сургуулийн моделийн ажлаа ч орхисонгүй. Гэхдээ тэр дуучин болохоор хатуу шийджээ. Дуучин болж, хэн нэгний удирдлага дор биш, өөрөө өөртөө эзэн болохыг хүсчээ. Удалгүй өмнөх хамтлагаасаа гарч, Денээс холбоогоо тасалжээ. Олон ч газрын хаалгыг татав. Нэг газар тогтож ажиллахгүй яваад байсан тухайгаа тэр хожим “Би хүмүүсийн дундуур нэвт гараад явчихдаг байсан юм шиг санагдаад заримдаа гэмшдэг байлаа. Авах юмаа авсан бол яваад өгдөг байсан” гэж ярьжээ. Сэтгэл санаа, тухайн үеийн байдлаасаа болж тэр үсээ байнга өөрчлөн буддаг байв. Тэгж явсны эцэст “Готам мюзик” компанийн Камилле Барбонэ түүний авьяасыг олж харжээ. Тэрээр бүх нөхцөл бололцоогоор ханган ажиллахаа амлаж, харин “Готам мюзик”-ийн эрчүүдтэй унтахгүй байх ганцхан болзол тавьжээ. Гэвч Мадонна бөмбөрчинтэйгээ унтсанаас тэр нь хөөгдөж, энэ явдал түүнд хүн чанаргүй зантай гэх гуншин авчирчээ. Камиллег бисекс гэж мэдээд Мадонна түүнд наалдан ойр ажиллахыг хичээх болов. Ер нь түүний уран бүтээлд лесби хайр сэтгэлийн тухай дуунууд нэлээд бий. Камилле түүнд чин сэтгэлээсээ тусалж байсан хэдий ч хөгжмийн тухай үзэл бодол нь зөрчилдсөн учраас тэд таарсангүй. Мадонна бүжгийн ритмтэй, гал цогтой дуу дуулахыг хүсдэг байсан бол Камилле түүнийг рок дуу дуулуулах гэдэг байжээ.

Дахин гудамжинд гарсан тэрээр Нью-Йоркийн зүүн хороололд нүүн очжээ. Ихэвчлэн ядуус амьдардаг энэ хороололд хэсэг хугацаанд амьдрахдаа тэр рэгль стилийг олж авч, хип хопт уруу татагдаж, граффит урлаг сонирхох болж, Boy Toy хэмээх хоч хүртэл авчээ. Дэлхийн хамгийн баян эмэгтэйчүүдийн нэг Мадонна тэр үед комиссын бараанаас хувцас худалдан авч өмсдөг байсан гэвэл та итгэх үү? Олон өнгийн хувцас давхарлан өмсөж, элдэв жижиг сажиг зүйлс энд тэндээсээ санжигануулан, оймсоор толгойгоо ороон дэгжирхсэн тэрбээр Нью Йоркийн гудамжаар яваа хүмүүсийг гайхан алмайруулах дуртай. Цаг үргэлж тэр шуугиан тарихуйц содон сонин хувцасладаг байлаа. Анхны сингл цомог “Every body” нь түүнд нэлээдгүй амжилт авчирсан юм. Хоёрдахь цомог болох “Burning up”-аа “Warner”-ын продюссер Рэгги Лукастай хамтран гаргасныхаа дараа тэрээр шилдэг продюссер менежер хайж яваад Майкл Жэксоноос дөнгөж салаад байсан Фреди де Манныг олж авсан нь түүнд асар том амжилт авчирчээ.

1985 онд тэрээр “The Vyrgin” нэртэй анхныхаа аялан тоглолтыг хийсэн юм. Энэ тоглолт дээрээ тэрээр хувцсаа тайлж шидлэн, нүүрний эгнээнд суусан үзэгчид рүү мөнгө цацан “Надад мөнгө хэрэггүй, надад хайр хэрэгтэй” гэж хашгирч байв. Тоглолтын оргил үед нь түүний аавын дүрд тоглох нэг эр тайзны ар луу түүнийг хүчээр авч ордог. Детройтод болсон тоглолт дээр төрсөн аав нь энэ үүргийг гүйцэтгэсэн байна. Аав нь охиныхоо амжилтыг үнэлэх болжээ. Мадонна асар их алдаршиж хуучин шигээ гудамж зээл, ресторанаар ч явж чадахаа болив. Түүнийг үзэн ядагчид ч олшров. “Цовдлуулсан Христ надад үнэхээр секси харагддаг. Тэр чинь нүцгэн эр хүн шүү дээ” гэж хэлсэн нь сүм хийдийнхний уурыг баржээ. Зарим хүн түүнийг түр зуурын од, хол явахгүй гэж хэлэхэд тэр үнэн сэтгэлээсээ дургүйцдэг байв. “Намайг секси гэж бүгд хүлээн зөвшөөрдөг байсан боловч миний авьяас чадварыг хэн ч үнэлж байсангүй” хэмээн хожим тэр дурсчээ. Олон эрчүүдтэй нэр холбогдож явсан тэрээр “Миний өөдлөн дэвжих замд хаягдаж гээгдсэн эрчүүд маань одоо бүгд намайг буцааж өөрийн болгохыг хүсдэг. Тэд одоо ч намайг хайрласаар байгаа, би ч тэдэндээ хайртай. Зорилгодоо хүрэхийн тулд хэн нэгэнтэй унтаж байсан удаа надад байхгүй шүү. Намайг гаж донтон л гэцгээх юм. Тийм дэмий юманд итгэхийн оронд ном уншсан нь дээр” гэж Мадонна ярьжээ.

Сонирхолтой хувцаслах төдий бус жинхэнээр нь хувцаслахын чухлыг Мадонна хамгийн сайн ойлгодог болсон байлаа. Тайзан дээр тэр төлөвлөөгүй нэг ч сул хөдөлгөөн хийдэггүй. Энэ хөлөө ингэж тавина, баруун гараа хоёрдугаар бадгийн үеэр дээш нь өргөнө гэхчлэн бүхий л үйл хөдлөл нь төлөвлөгөөний дагуу явагддаг аж. 1985 оны долдугаар сард тэрээр сүй тавихаа зарласан байтал “Playboy”, “Penthouse” сэтгүүл дээр түүний нүцгэн зурагнууд гарав. Тэрээр моделиор ажиллаж байх үеийнхээ нүцгэн зурагнуудаас ичсэнгүй, харин өөрөө үүний эсрэг юу ч хийж чадахгүй байгаадаа, түүнийг хэвлэлийнхэн ийнхүү мөлжиж байгаад л их ичиж байжээ. Удалгүй тэрээр “Vanity Fair” сэтгүүлд чармай нүцгэн зургаа гаргаж, “Sex” номондоо нүцгэн төдий бус, хамаг нандин бүхнээ ил гаргасан зурагнууд тавьжээ.

1985 оны наймдугаар сарын 16-нд тэр Шон Пеннтэй гэрлэв. Тэд гэрлэх ёслолоо ихэд нууцлан Малибуд хуримласан боловч аль хэдийнэ тэнд сурвалжлагчид очсон байжээ. Түүний нөхөр Шон агаарт эргэлдэх нисдэг тэрэгнүүд рүү уурсан гар буугаар буудаж байсан тухай хэвлэлүүд тэр үед бичиж байв.

Хөхөвч, торон оймс ... “underweаr as outwear” түүнийг дэлхий даяар алдаршуулж, хувцас загварын чиглэлийг тодорхойлогч, секс шүтээн, гоё ганганы хатан хаан болгосон юм. 1987 оноос “Ертөнцийн хамгийн саак бүсгүй “ гэж түүнийг магтаад байсан Шоноосоо тэр холдож эхэлсэн юм. Мадонна хэвлэл мэдээллийнхнийг сайн ойлгодог байсны хувьд хаагуур явахаа урьдчилан тэдэнд мэдэгдэж сенсаац дэгдээх сонирхолтой байхад Шон гэр бүлийн хүрээндээ даруухан амьдрах гэж, үүнээс болж тэр хоёр зөрчилдөж эхэлжээ. 1989 онд тэд салах өргөдлөө өгөв. Шон түүнийг киноны ертөнцөд оруулах үүргээ гүйцэтгээд явах цаг нь болжээ гэдгээ ухаарчээ.

Мадонна “Pepsi” компанитай гэрээтэй ажиллан аялан тоглолтоо спонсорлуулахаар болж клипээ хийлгэсэн боловч нэг удаа цацагдаад дахин гарахыг нь хорьжээ. Учир нь сүм доторх амь орсон бурхны барималтай секс хийж, нэгэн аллагын гэрч болж, шатаж буй цовдлогдсон христийн өмнө дуулж буй үйл явдал клипэнд гардаг нь үзэгчдийн дургүйцлийг төрүүлжээ. Ялангуяа үүнийг ватикан эсэргүүцэв. “Blond ambition” аялан тоглолтыг нь зарим нэг хотод тоглохыг хоригложээ. Италид хоёр ч концертоосоо татгалзах болсон тэрээр “Намайг нүгэлтэн гэж та нар итгээд байгаа бол нүгэл үйлдээгүй хүнээр над руу чулуу шидүүл л дээ” хэмээн хэвлэлийн хурал дээр тэр зарлаж байв. Хожмоо нэг клипийг нь МТV нэвтрүүлэхээс татгалзав. Хэтэрхий порнограф маягийн үзүүлбэрүүд орсон гэж үзжээ. Энэ клипэнд Мадонна хувцсаа тайчин хаяж, нэг эрийн өврөөс нөгөө эрийн өвөр рүү дамжин, лесби гомо нартай тэврэлдэн, хүүхнүүд сахал тавин, эрчүүд нь эм хүн шиг аяглан, тэр доторх бүхий л зүйлсийг нийгэм хүлээн зөвшөөрөхгүй боловч аливаа юм болгон харагдаж буй шигээ биш гэдгийг тэр уг клипээрээ харуулахыг зорьжээ.

“Sex” нэртэй түүний ном нь 1992 онд хэвлэгдэв. Түүний хагас нүцгэн, нүцгэн зурагнууд, Наоми зэрэг одуудтай хэрхэн явалдсан тухайгаа, лесби, гомо нарын тухай тэнд ёстой л бантан болгож өгсөн байв. “Энэ дэлхий юм бүхэн л секс дур сонирхол, сексийн эргэн тойронд болдог шүү дээ. Заримдаа надад эмэгтэй хүнтэй унтах хүсэл төрдөг. Би нуухгүй. Хүн хүсэл сонирхлынхоо дагуу л амьдрах хэрэгтэй. Үүнээсээ ичих ямар ч шаардлагагүй” хэмээсэн нь олныг гайхашруулсан юм. Эмэгтэйчүүдийн хөдөлгөөнүүдийн нэлээд нь Мадоннаг дэмжиж байв. Тэрээр “Эмэгтэйчүүд ялангуяа залуу бүсгүйчүүдэд би итгэл хүч чадал өгдөг гэдэгтээ итгэлтэй байдаг. Энэ талаасаа бол би эмэгтэйлэг” гэж ярьжээ.

“Girlie show” түүнийг ихэд алдаршуулсан юм. 1994 оны гуравдугаар сард Дэвид Леттермэнтэй хамтран “Late show” хийжээ. Леттермэн түүнийг “Дэлхийн хамгийн том оддын нэг, энтертайнмент бизнесийн алдартай олон эрчүүдтэй унтаад амжсан” хэмээн шоуны үеэр танилцуулжээ. Мадонна хариуд нь дотоожоо түүнд өгөөд үнэрлээд үз гэж шаардав. “Дүүшинд орж байхдаа шээх сайхан гэдгийг та мэдэх үү. Шээс хөлний мөөгөнцөрт тун сайн. Хүн болгон л дүүшинд шээж, хамраа ухдаг шүү дээ гэх зэргээр тэд ярилцжээ. Энэ тухайгаа хожим нь “Тэр үед би маш их ууртай байсан. Надад олдсон хүмүүжил, нийгэм ямар их секси болж байгаад уур хүрч байсан. Намайг дур булаам харагддаг болохоос биш ямар ч авьяасгүй гэж үздэг хүмүүст үнэхээр их уур хүрч байсан. Хэвлэлүүд над руу довтолж би хохирогч болж буйгаа ойлгосон. Тэр үдэш уураа үзэгчдэд гаргачихсан нь тэр л дээ. Бахархаад байх ч юм биш” гэж дурсчээ.

“Секс” номынхоо талаар “Эцгийнхээ эсрэг, намайг хүмүүжүүлсний эсрэг, соёлын эсрэг, нийгмийн эсрэг, бүхний эсрэг үзүүлсэн миний эсэргүүцэл байсан“ хэмээжээ. “Evita” киноны хатагтай Пероны дүрд Мадонна тоглов. Энэ дүрийг авахын тулд найруулагчид нь тэр захиа бичиж яагаад энэ дүрд сайн тоглож чадахаа тоочжээ. Энэ дүрд тоглохын тулд Эвита Пероныг таньдаг байсан хүмүүстэй уулзан ярилцаж маш их судалгаа хийсэн гэдэг. Аргентин улсын ерөнхийлөгчийн ордонд зураг авах зөвшөөрлийг уг киноныхон авч чадаагүй ажээ. Тэгмэгц Мадонна ерөнхийлөгчтэй биечлэн уулзаж, зөвшөөрүүлж чаджээ. Кино ч их амжилт олж Мадонна “Алтан бөмбөрцөг” шагнал гардсан юм. 1994 онд цэцэрлэгт хүрээлэнд алхаж яваад тэр охиныхоо эцэг Карлос Леонтой танилцсан гэдэг. Охиноо өөрийн эцэг шиг хатуу гараар хүмүүжүүлдэг байв. Телевиз үзэх цагийг нь хязгаарлана, амттан хамаагүй идүүлэхгүй. “Интернэт харилцаа бус жинхэнэ амьд харилцаанд хүүхдээ сургахыг хичээдэг. Охиноо би католик шашинд оруулж библи уншуулна. Энэ бол мөрдлөг болгож явах журам биш, зүгээр л хүмүүст сургахын тулд зохиосон зүйл гэж хэлнэ. Бүх шашныг холбож байдаг гарцаагүй үнэнүүд байдаг. Би бүгдэд нээлттэй байхыг л боддог. Бид бүхэнд бурханлаг чанар байдаг, бид бурхан болж чадах чадвартай” хэмээн тэр өгүүлжээ.

1998 онд Мадонна Гай Ричитэй танилцаж, 2000 онд түүний хүү Рокко төржээ. Хүүхдүүдтэй болсноосоо хойш тэр аавыгаа ойлгодог болжээ. “Би аавдаа хайртай. Аав минь над шиг л хатуу хүн байсан. Бас хүүхдэдээ хайртай. Намайг багад сахилгагүй намайг хүмүүжүүлэх гэж аав минь яасан их тэсвэр тэвчээр гаргадаг байсныг би өөрөө гэр бүлтэй болоод л ойлгож байна“ хэмээн хожим нь ярьсан байдаг. Өдгөө ч түүний хувийн амьдралын тухай сенсаац хэвлэлээр гарсан хэвээр. Өөрөөсөө 28 насаар дүү, Бразилийн загвар өмсөгч залуутай нэр холбогдоод амжсан тэрээр Малавигаас хүүхэд өргөж авсан нь бас шуугиан тарив. Гал цогтой, эрч хүчтэй энэ дуучны тухай бичих зүйл үнэхээр барагдахгүй ажээ. Бүхэл бүтэн роман гаргахад ч багадмаар. Болохгүй бүтэхгүй гэж бүхний эсрэг явж, нийгмийн хүлээсийг алдууртал хамгийн гол нь үзэл бодолдоо үнэнчээр тэмцсэн түүнийг өдгөө домог болгон шүтэж, хатан хаан хэмээн өргөмжилж байна. Энэ алдрыг тэр зүгээр сууж байгаад олж аваагүй юм. Манайхны од гэгдээд буй, хорвоод хосгүй юм шиг царайлаад байгаа залуус үүнийг уншаад нэгийг бодоосой, нэр хүндийг хэр сайн рекламдсанаараа биш, асар их хүч хөдөлмөрөөр олж авдгийг мэдээсэй гэж өөрийн эрхгүй хэлмээр санагдана. Хүн амьдралынхаа турш зорьсон зорилготой, хэлье гэснээ хэлчихдэг, өөрийнхөөрөө, хурц дайчин байж тэмцэж амьдрах хэрэгтэй юм байна гэдгийг энэ агуу дуучны намтар түүх харуулж байна.