Олон орны найзуудтай болсондоо баяртай байна
Германы сурагч солилцооны алба дэлхийн өнцөг булан бүрээс герман хэлийг сайн эзэмшиж, суралцаж байгаа 480 орчим хүүхдийг сарын хугацаагаар ХБНГУ-д урьж, зардлыг нь даадаг ажээ. Жил бүр герман хэлний улсын олимпиадаас Монголын шилдэг хоёр оролцогчийг шалгаруулдаг билээ. Тус олимпиадын ялагчаар шалгараад Германд аялаад ирсэн 18- р сургуулийн 11-р ангийн сурагч Г.Дашням, 38-р сургуулийн 11-р ангийн сурагч М.Хулан нарыг зочноороо урилаа.
- Аялал сайхан болсон уу, сэтгэгдэл ямар байна даа?
М.Хулан: - Сурагч солилцооны албаны тэмцээнд ялагчаар шалгарсандаа би одоо болтол итгэж чадахгүй байна. Амьдралынхаа хамгийн сайхан зуныг өнгөрөөлөө.”
Г.Дашням: - Герман хэлийг хичээж сайн сурснаар, би төсөөлж байснаасаа ч илүү их амжилтад хүрч чадсан шүү.
- Германы олон хотоор аялав уу, аяллынхаа сонин сайхнаас сонирхуулна уу?
Г.Д: - Бид хоёр одоо дотно сайн найзууд болцгоосон. Аяллын турш бидний уулзсан германчууд эелдэг зочломтгой хүмүүс байлаа. Индонез, Бразил, Чех, Энэтхэг, Герман хүүхдүүд өөр өөр шашин шүтлэг, үндэс угсаа, хэл соёлтой ч германаар бие биетэйгээ сайн ойлголцож байлаа.
М.Х: - Сургуулиа төгсөөд Индонез найзтайгаа Германд уулзаж хүссэн мэргэжлээ эзэмшицгээнэ шүү гэж тохиролцсон.
Г.Д: - Бид Бонн, Кёлн, Берлин, Целли, Гослар, Мюнхен зэрэг хотод зочилсон. Алдарт хөгжмийн зохиолч Бетховений төрсөн гэрийг үзэж, Рейн мөрнөөр усан онгоцоор аялсан. Кёлн хотын 400 жилийн турш баригдсан алдартай католик сүмийг үзсэн. Германчуудын тэн хагас нь католик шашинтай юм байна лээ.
- Германчуудад Монгол орноо сурталчилж явав уу?
М.Х: - Бонн хотод олон үндэстний үдэшлэг зохиогдсон юм. Хүүхдүүд бүгдээрээ өөрсдийнхөө эх нутгийн соёл урлагтай танилцуулсан. Бидний илтгэл ч мөн Монгол орон болон Чингис хааны тухай байлаа. Бас Монгол үндэсний бүжгээ бүжиглэсэн.
Олон үндэстний хоолны өдөрлөгт оролцож, үндэсний хоол “бууз” болон “нийслэл салат”-аараа зочдоо дайлсан.
- Германчуудын дуртай хоол нь юу вэ?
М.Х: - Герман хоол амттай, илчлэг ихтэй ч шөл, цагаан будааг бага хэрэглэдэг нь нэг тиймэрхүү байсан. Тэд ихэвчлэн төмс, хиам болон гахайн мах их хэрэглэдэг юм байна лээ.
- Сурагч солилцооны хөтөлбөрөөр аялаж байгаа хүүхдүүд герман айлд амьдарч үздэг гэсэн?
Г.Д: - Целли хотод хааны ордон, хотын захиргааны байшинд айлчилсан. Жижигхэн, цэвэрхэн бас эртний хот. Тэндээ бид герман айлд байрласан. Тэднийх надтай чацуу нэг охинтой. Бид найзууд болцгоосон. Айлд амьдарч үзсэнээрээ германчуудын аж амьдралтай илүү ойр танилцах боломж олдсон шүү. Бид хоолны дараа хоёр орны тухай сонирхолтой яриа өрнүүлдэг байлаа.
- Германы дунд сургуулийн сургалт манайхаас өөр үү?
М.Х: - Манай группийнхэн Хёлти сургуульд зочлон суралцсан. Герман сургууль манай сургуулиас өөр. Оюутан болохын тулд 13 жил сургуульд сурсан байх ёстой. Их завсарлага нь 30 минут үргэлжилнэ. Сурагчид хоолоо гэрээсээ авчирдаг. Багш нар нь бүгдээрээ англи хэлний мэдлэгтэй, чөлөөтэй ярьж чаддаг нь сайхан санагдсан.
- Сэтгэлд үлдсэн хамгийн хөгжилтэй мөч?
Г.Д: - “Рейхстагийн их хурлын танхимд суугаад, телевизийн цамхагаас Берлинийг бүхэлд нь харах, алдарт “Брандербургийн хаалга”-ны урд зургаа авахуулах сайхан байсан. Амралтын өдрөөр хүүхдийн паркад өдөржингөө тоглосон ч ядраагүй. Бид бас олимпийн цэнгэлдэх хүрээлэн, Альпийн нуруунд очиж үзсэн. Мөнх цастай Цүгшпитцэ ууланд халуун зун цасаар тоглох гоё байлаа. Энэтхэг, Бразилчуудад энэ нь бүр ч их таалагдсан гэсэн.
М.Х: - Театрт тоглолт үзэж, орой нь үдэлтийн үдэшлэг зохиосон. “Камелион”-д очиж аялалынхаа бүх гишүүдтэй уулзсан. Харин хамгийн сонирхолтой нь тэнд театрын жүжигчид нь үзэгчдийн хэлсэн саналаар шууд жүжгээ зохион тоглож байсан явдал юм. Хэзээ ч мартагдахааргүй зүйл бол метроноос чангаас чангаар “суугаад!”, “буугаад!” гэх хөтөчийн дуу байлаа.
- Хамгийн их таалагдсан нь ямар хот байсан бэ?
М.Х: - Баварийн нийслэл Мюнхен хамгийн их таалагдсан. Өндөр барилгууд нь сүүлийн үеийн, юмны үнэ нь хамгийн өндөр, түүнээс гадна машинууд нь ч хамгийн хурдан хот байсан шүү.
Г.Д: - Вольфсбургийн алдарт Фолксваген хэмээх машины үйлдвэрт очсон. Тэнд очиход үнэхээр сонирхолтой. Хаа сайгүй тансаг чамин машинууд!
Та бүхэн энэ хотод зочилбол олон орны хүмүүсийг харахаас гадна герман хэлээс илүү англи хэлийг сонсох байх. Энд их олон туркчууд амьдардаг.
- Та хоёр олон найзуудтай болсон байх даа?
М.Х: - Мюнхений онгоцны буудал дээр бүгд нүдэндээ нулимстай салцгаасан. Энэ аялал бидэнд их зүйлийг өгсөн. Дэлхийн бүх өнцөг булан бүрээс ирсэн олон сайхан найзуудтай болж, цагийг хөгжилтэй өнгөрөөж, герман орны талаар их зүйлийг мэдэж авсан.
Г.Д: - Бразил, Энэтхэг, Индонез, Словак, Сальвадор, Хорват, Герман хүүхдүүдтэй нөхөрлөж, тэдэнтэй хамтдаа байсан хоромыг үгээр илэрхийлэхийн аргагүй. Энэ бүгдийг үзэж, орон орны сайхан найзуудтай болсондоо бид их баяртай байна.