ӨГЛӨӨ ХААН, ӨДӨР НОЁН, ОРОЙ ГУЙГАЧИН ШИГ ХООЛЛОЖ СУР
Тэгвэл хоолыг эм болгож эрүүл хооллох боломж бидэнд байна. Тухайлбал, тариа будааны хальс илчлэг ялгаруулдаг төдийгүй энэ нь хоол боловсруулах явцыг түргэтгэн, гэдэсний гүрэлзэх хөдөлгөөнийг идэвхжүүлдэг. Тэгэхээр будааны талх, арвайн гурил, хоёрдугаар гурил, хивэгтэй гурил зэргийг идэж байвал эрүүл мэндэд хэрэгтэй, хэтэвчтэй мөнгөнд ч арвитай ажээ.
Дотор эрхтэн эрүүл байх нь бусад эрхтэн эрүүл байх нөхцөлийг бүрдүүлдэг гэнэ. Зарим хүн өөх хортой гээд нүнжигтэй бүхнээс зугтаадаг. Гэтэл хүний биед өөх тос бас чухал хэрэгцээтэй ажээ. Тэгээд ч Монгол орны цаг уурын онцлогоос болоод бид өвөлдөө илчлэг ихтэй хоол идэх зайлшгүй шаардлагатай. Нэг грамм тос 39kJ энерги өгнө. Хүн өдөрт бас 4-6 г тосны хүчил биедээ авах шаардлагатай гэнэ. Хүний биед зайлшгүй шаардлагатай А, D, K амин дэмүүд зөвхөн тосонд л уусна. Тэгээд эдгээр амин дэмүүд зөвхөн өөх тос “хөлөглөн” зохих газраа хүрч, үр дүнгээ өгдөг юм байна.
Та бидний өдөр тутмын хоолондоо хэрэглэдэг зарим хүнсний ногоо хүний бие организмд ямар нөлөө үзүүлдэг талаар зарим мэдээллийг одоо танд хүргэе. Сонгино хэмээх байгалийн антибиотекийг ханиад томуу ихэссэн үед түлхүү хэрэглэх шаардлагатай. Байнга хэрэглэвэл цусан дахь холестерины хэмжээ багасдаг. Түүхийгээр нь идвэл илүү сайн. Мөн цусны даралт багасгах үйлчилгээтэй ажээ.
Байцаанд вета, каротин, кальци, фолик хүчил, кали, витамин С, Е болон биотен, магни, манган, эслэг, нүүрс ус агуулагддаг. Хавдрын эсрэг үйлчилгээтэй глюсодинолате гэдэг бодис байдгийг эрдэмтэд нээжээ. Мөн түүнчлэн байцаа нь элэгний хоргүйжүүлэх үйл ажиллагааг идэвхжүүлдэг байна.
Үндэстэн бүхэн зөв хооллохын чухлыг эртнээс анхаарч туршлага хуримтлуулан, түүнийгээ үр хойчдоо сургаж иржээ. Европчууд өглөө хаан хүн шиг, өдөр ноён хүн шиг, орой гуйлгачин хүн шиг хооллож бай хэмээн өдөр идэх хоолоо хэдийд ямар хэмжээгээр идэх вэ гэдгийг сургадаг байна. Бас манай ард түмэн гэнэт цадах гэдсэнд цөвтэй, гэнэт баяжих насанд цөвтэй гэж хэлэлцдэг нь хоолыг хэт их идэх хортойг сургажээ. Бас гэм хийсэн гэдэс биш гэнэт олдсон хоол биш хэмээдэг нь олдсон зоргоор идэх нь эрүүл мэндэд хортой, ходоод гэдсээ хордуулах хэрэггүй гэсэн гүн утгатай сургааль ажээ.
Бас зундаа сүү цагаан идээ илүү хэрэглэх нь өвөлжин хүнд хоол боловсруулж ядарсан ходоод гэдсээ амраан, бас өвөлдөө олж аваагүй амин дэм, эрдэс давсаа сүү цагаан идээнээсээ олж авах сайн талтай юм. Сайн хооллох гэдэг хэт их идэхийн нэр биш хэрэгцээтэй зүйлээ л тэндээс олж авах явдал юм. Хоол тэжээлээрээ дамжуулан хүн амьд явах, амьсгал авах, өсөж бойжих, хөдөлж, үржихэд зайлшгүй шаардлагатай зүйлсийг нөхөн олж авдаг. Хүн ургамлын гаралтай ногоо, жимс, үр тариа хийгээд малын гаралтай сүү, өндөг, мах зэргээр хооллоно. Хүн хоол хүнсээрээ дамжуулан өдрийн хэрэгцээний дүүргэгч бодис, уураг, нүүрс ус, тос, эрдэс, амин дэмийг олж авна.
Ходоод гэдсэнд орсон хоол тэжээлийн зүйлс энзимийн тусламжтайгаар задран тэндээс ялгарсан, хүний биед шаардлагатай чухал бодис, элементүүд цусаар дамжин бүх бие мах бодид түгэн хэрэгцээт эд эрхтэндээ хүрч очдог. Хөдөлгөөний эрч хүч хийгээд дулаан ялгарна. Биенд үлдсэн хэрэггүй зүйлс хүний ялгагдас, болон амьсгалаар дамжин гадагшилдаг.
Насанд хүрсэн эрүүл хүн биеийн жингийн нэг килограмм тутамдаа нэг цаг тутам 4,2 kJ энерги шаардлагатай бөгөөд энэ энергийг хоол ундаараа дамжуулан авдаг байна.
Энэ хорвоод эрдэнэт хүний биеийг олж төрсөн бид энэ биеэ хайрлаж, зөв хооллож, урт удаан наслах хэрэгтэй бус уу. Хүн гэдэг аугаа их ухаантай амьтан мөртлөө өөрийнхөө биеийг л хайрлаж чаддаггүй том дутагдалтай ажээ. Эмийг голдуу өдөрт гурван удаа уудаг шиг хоол ундаа ч бас өдөрт гурван удаа хэрэглэж байх ёстой бөгөөд тэгэхдээ хэм хэмжээндээ тохируулан бие махбодид зайлшгүй шаардлагатай зүйлийг агуулсан хоол унд идэх ёстой. Их үнээр заримдаа хоол биш хор худалдан авч иднэ. Хоолыг эм шиг сонгон зөвхөн хэрэгтэй хүнсээ, шаардлагатай хэмжээгээр нь идэхгүй бол янз бүрийн өвчин, хуучтай болох нь байна шүү.
