Шинэчлэлийн гэх тодотголтой өнөөгийн засгийн газрын хийж байгаа ажил, гаргаж байгаа бодлого шийдвэрүүдийг нь харлаа. Засгийн газар байгууллагдсанаас хойш нэг жил болсон хэдий ч гоц гойд юм хийчихсэнгүй. Нөгөө л хийдэг зам барилгынхаа ажлыг хийсээр, үүнийгээ агуу их бүтээн байгууллалт өрнөж байна гэж худал ярьсаар.

Үнэнийг хэлэхэд магтан дуулаад байгаа бүтээн байгуулалт дээр нь хятадууд ажиллаж, харин монголчууд гудамжаар ажилгүй алхаж байна. Өнөөдрийн шинэчлэлийн засгийн гзарын сайдуудын 90 хувь нь өмнө нь сайдын албыг хашиж байсан хуучин хүнд гарууд бий. Тэд яаж тендер зувчуулж, төрөөс хулгай хийхээ хамгийн сайн мэддэг нөхдүүд. Муу юмандаа дэндүү сайн бөгөөд харин сайн юмандаа дэндүү муу хүмүүс.

Гэтэл засаг төрийн ажил улс орон, ард түмнийхээ төлөө сайн сайхан юм хийхийг шаардаад байдаг. Даана ч муу юманд л толгой нь сайн ажилладаг нөхдүүд маань, улс орныг хөгжил, ард түмний амьдрал, эрүүл мэнд, боловсролын тухай юм хийх гэсэн чинь толгой нь хүрдэггүй ээ, мэдлэг нь ч дутсаар.

Ингээд бүх зүйл бахь байдгаараа үргэлжилж байна. Сайдууд гэж өөрсдийгөө мундаг гэж мэдэрсэн тэд юу ч хийж чадахгүй гэдгээ мэдсээр байж мэддэг юм шиг царайлж, харц нь ханаар тэнүүчилнэ. Олон түмний өмнө гараад чухал царайлан худал ярина. Үнэндээ тэдний хамгийн сайн чаддаг зүйл нь худал ярих шүү дээ.

Ерөнхий сайд Н.Алтанхуяг Бурхан Халдунд төөрч, Шадар сайд Д.Тэрбишдагва хамаатнуудаа албан тушаалд томилж, Л.Болд Банкныхаа хувьцаа эзэмшигчидтэйгээ маргалдаж, Ч.Улаан Морио уяж, Х.Тэмүүжин хууийн шинэчлэл ярьж, С.Оюун мод тарих гэж, Д.Бат-Эрдэнэ нүүрсээ заран баяжиж, Л.Гантөмөр сурагчийн дүрэмт хувцасны бизнес хийж, Ц.Баярсайхан амжиж идэх гэж, А.Гансүх Баттулга ахынхаа төлөө зүтгэж, С.Эрдэнэ Баянгол дүүргийг эзэмшилдээ авах гэж, Ц.Оюунгэрэл эртний үлэг гүрвэлийн яс ярьж, Я.Санжмятав жижигхэн үйлдвэр ярьж, Н.Батбаяр Чингис бонд, Чингис хоёроо ялгахаа байж, Х.Баттулга мафийн тороо нэхэж, Д.Ганхуяг Оюу Толгойг хамгаалж, М.Сономпил авлига нэхэж, Ч.Сайханбилэг авгайгаа өмөөрч, Н.Удвал Энхбаярынхаа төлөө зүтгэж л нэг жилийг үдлээ.

Хувийн хүсэл, шуналдаа автагдсан өнөөгийн сайдууд шинэчлэлд хамгийн ихээр чөдөр тушаа болж байна. Ерөөсөө ийм сайдууд шинэчлэлийг хийдэггүй л байхгүй юу. Тэдний оронд мэдлэг боловсролтой, улс орныхоо төлөө юм хийе гэсэн хүмүүс гарсан бол өнөөдөр жинхэнэ бүтээн байгуулалт өрнөх байлаа. Энэ хүмүүс монголын төрийг хувьцаат компани болгожээ.

Сайдын суудалд суусан тэд амжиж идэх гэж хичээцгээж байна. Тэд шинэчлэл гэдэг үг хэрэглэдгээс биш бодит шинэчлэлийг хэзээ ч хийж чадахгүй ухааран ойлгох цаг болжээ.

ШИНЭЧЛЭЛИЙН ЗАСГИЙН ГАЗРЫН ХУУЧИН САЙДУУД

Жич: Өмнөх засгийн газарт ажиллаж байсан зарим сайдууд энэ засгийн газарт салбараа солин суужаа. Х.Баттулга Сайншандын төслөө орхиж үйлдвэр хөдөө аж ахуй руу орсон бол Лу.Болд Батлан хамгаалахаа орхиж Гадаад харилцаа руу урважээ.