Улс төр дэх ургийн бичээсийг нэг зурж үзмээр санагдлаа. Нэг намын харьяалалтай ах, дүү, амраг, садангуудын намтар хүмүүсийн сонирхлыг тийм ч их татахаа байж. Тиймээс өөр, өөр намтай амьдарлаа холбож, улс төр дэх ургийн бичгээ зурж яваа гэр бүлийнхний талаар сонирхуулъя.
Тэртээх он жилүүдэд С.Баяр, Х.Хулан нарын эхлүүлсэн энэхүү ургийн бичээст хамгийн отгоноор бүртгэгдэж байгаа нь сумогийн их аварга Д.Дагвадорж, УИХ-ын гишүүн Д.Сумъяабазар нар юм. Их аварга Д.Дагвадорж зодог тайлснаасаа хойш бизнесийн салбарт хүч үзэх болсон бөгөөд түүнийг улс төрд хөл тавих нь гэсэн мэдээлэл байнга шахам гарч байсан ч тэрбээр саяхныг хүртэл буюу энэ сарын 13-ны өдөр өөрийн цахим хуудастаа “Би улс төрөөс хол байдаг хүн” гэж байсан нь бодит үнэн.
Гэтэл “будаг нь хатаж амжаагүй байхад” гэдэг шиг хэлсэн үг нь хэнд ч мартагдаж амжаагүй байхад аварга маань дөнгөж өчигдөрхөн Ардчилсан намд элсэж, шинэхэн батлахаа өвөртөлж амжлаа. Харин түүний ах Монгол Улсын аварга Д.Сумъяабазар Ардын намын гишүүн бөгөөд НИТХ-ын 2009 оны сонгуулиар төлөөлөгчөөр сонгогдож байсан. УИХ-ын 2012 оны сонгуульд Сонгинохайрхан дүүрэгт нэр дэвшиж, УИХ-ын гишүүнийхээ тангаргийг саяхан өргөөд байгаа. Энэхүү ургийн бичээсийн эхлэлийг С.Баяр Ерөнхийлөгчийн Тамгын газрын дарга байхдаа тавьсан гэлцдэг. Тухайн үед Ерөнхийлөгчийн Тамгын газрын даргаар ажиллаж байсан С.Баяр Ардчилсан намаас УИХ-д сонгогдсон Х.Хулантай гэрлэсэн байдаг юм.
Энэхүү бичээс “Оюуны Ундраа”-гаар овоглодог гэр бүлийнхнээр үргэлжилнэ. МАШСН-ыг Ардчилсан намаар сольсон, Онцгой байдлын сайд асан, одоо Эрчим хүчний зохицуулах хорооны даргаар ажиллаж буй С.Отгонбаярын дүү С.Амарсайхан Ардын намаас НИТХ-д сонгогдоод байгаа. С.Амарсайханы эхнэрийг МҮОНТ-ийн нэвтрүүлэгч С.Чимгээ гэдгээр нь хүмүүс андахгүй мэдэх байх. УИХ-ын гишүүн С.Одонтуяа Ардчилсан намынх хэдий ч түүний нөхөр Г.Өлзийбүрэн Ардын намын гишүүн. Тэрбээр Газрын тосны газрын даргын албан тушаалыг өдгөө хашиж байгаа. Мөн Иргэний хөдөлгөөний удирдагчаас Ардчилсан намын гишүүнээр элсэж, УИХ-д сонгогдсон Ж.Батзандангийн ах Ж.Бат-Эрдэнэ Ардын намын гишүүн. Одоо “Монголын цахилгаан холбоо” ХК-ийн Гүйцэтгэх захирлын албан тушаалыг хашиж байгаа Ж.Бат-Эрдэнэ Ардын намыг эрх барьж байх үеэс эхлээд энэ салбартаа тогтвор суурьшилтай ажиллаж байгаа нэгэн юм. УИХ-ын гишүүн Б.Наранхүү эгч Б.Саранчимэгтэйгээ улс төрийн үзэл бодол таардаггүй гэлцдэг.
Тэдний сонголт анхнаасаа л өөр байсан. Б.Наранхүү Ардчилсан намыг тууштай дэмжигч бол түүний эгч Б.Саранчимэг анхнаасаа Ардын намыг дэмждэг байсан. Б.Саранчимэг Ардын намыг эрх барьж байх үед буюу өнгөрсөн дөрвөн жилийн хугацаанд НИТХ-ын төлөөлөгч, Үндэсний цэцэрлэгт хүрээлэнгийн захирал байсан. Одоо ч Үндэсний цэцэрлэгт хүрээлэнгийн захирлын албандаа байгаа. Монголбанкны Ерөнхийлөгч асан Л.Пүрэвдорж Ардын намын гишүүн. Түүний хүү П.Хангал нь аавыгаа дагаж Ардын намд элсэж, НИТХ-д нэр дэвшиж, ялалт байгуулж байсан ч саяхнаас Н.Энхбаярыг дагаж, МАХН-ын гишүүнээр элссэн. Одоо П.Хангал МАХН-ын Санхүү хариуцсан даргаар ажиллаж буй. Энэ мэтчилэн улс төр дэх ургийн бичээс цааш хөвөрнө.
Р.САРАНГОО
Эх сурвалж: Улс төрийн тойм сонин