-МЭДЛЭГИЙН ЭДИЙН ЗАСАГ... Өнөөдөртөө энэ сэдэв улстөрчдийн анхаарлыг төдийлөн татахгүй байгаа болохоос уг нь шавхагдашгүй баялаг бүтээх чухал санаа-
-
Бөмбөрцөгийн олон мянган тэрбум хэрэглэгчийн өдөр тутмын хэрэглээ болсон фэйсбүүкийг үүсгэн байгуулагч Марк Цукерберг дэлхийн хамгийн баян 16 хүний нэг болоход түүнд алт зэсийн орд, алмазны уурхайн аль аль нь байсангүй. Зөвхөн мэдлэгт суурилсан баялаг бүтээсний ачаар тэр дэлхийн хамгийн залуу тэрбумтнаар тодорч чадсан юм.
Америкийн улс төрийн зүтгэлтэн Бенжамин Франклиний хэлсэн нэг үг байдаг. Мэдлэгт оруулсан хөрөнгө оруулалт хамгийн өндөр хүү төлдөг гэж. Сүүлийн үед БСШУ-ны сайд Лу.Гантөмөр энэ талаар багагүй ярих болсон байна билээ. Өнөөдөртөө улстөрчдийн анхаарлыг төдийлөн татахгүй байгаа болохоос уг нь шавхагдашгүй баялаг бүтээх гэсэн чухал санаа. Ганц ам.долларыг мянга болгон өсгөж чадах цорын ганц үйлдвэрлэл бол мэдлэгийн эдийн засаг байдаг гэдэг. Энэ утгаараа шавхагддаг баялагаа булаацалдан хэрэлдэх бус шавхагдашгүй нөөцөө ашиглахад анхаарах цаг болсныг эрдэмтэд тавдугаар сарын дундуур Төрийн ордонд болсон “Үндэсний инновацийн форум”-ын үеэр сануулж байсан юм.
Тавантолгой, Оюутолгойг тойрсон хэрүүл саарал ордонд ид өрнөж байна. Уул уурхайг дагасан их мөнгөний үнэрт согтсон Монголын улстөрчид хэн нь хэнтэйгээ нэг халаасанд орсон хийгээд хэдэн бүлэглэлд хуваагдсныг хэлэхэд хэцүү биш болсон. Хэдийгээр эрдэс баялгаа эргэлтэд оруулж, эдийн засгаа хямралаас гаргах нь Монгол Улсын ойрын бодлого ч алсдаа зөвхөн уул уурхайгаа ухаж баяжих бус тархи толгой, мэдлэг, оюунаа дайчилж амьдрах зайлшгүй хэрэгцээтэй тулгарах нь гарцаагүй.
Монголын эдийн засагт ерөнхийдөө Тавантолгойг хэн авах вэ гэсэн улс төр-эдийн засгийн бүлэглэлүүдийн талцал, зодоон л болох болсноос хэний тархийг ухаж, ямар мэдлэг, ямар ноу-хау гаргаж ирэх талаарх эрүүл өрсөлдөөн алга байгаа нь худлаа биш. Ийм болохоороо Монгол ядуу байдаг ч биз.
Өнгөрсөн жил япончууд сансарт хүргэх цахилгаан станцтай болох том амбицаа дэлхий нийтэд танилцуулсан. 2050 он гэхэд цахилгаан шатанд суугаад сансарт гарна гэдэг өнөөдөр бүтэшгүй мөрөөдөл мэт сонсогдож байгаа ч япончууд энэхүү шилдэг төлөвлөгөөгөө бодит болгоход хөрөнгө мөнгө хайрлахгүй гэдгээ ч зарласан юм. Харин монголчууд шинжлэх ухаанаа хөгжүүлж, мэдлэгийг мөнгө болгоход жилд хэдийг зарцуулдаг вэ. Жил бүр 40 мянган оюутан их, дээд сургууль төгсөн гардаг ч харамсалтай нь, тэд дипломтой худалдагч, баарны үйлчлэгчээс хэтэрч чадахгүй байгаа шүү дээ.
“Синхрон генераторын реактив чадлын автомат тохируулга болох NaNyam-AX12 болон түүний виртуал лаборатори” гэх бүтээлээрээ Төрийн соёрхол хүртсэн Н.Нацагнямыг эс тооцвол мэдлэгээ үйлдвэрлэл болгосон эрдэмтэд, түүнийг нь дэмжсэн бизнесмэн тун цөөн. Ёстой л гарын таван хуруунд тоологдох төдий гээд хэлчихвэл бодит үнэнээс хол зөрөхгүй биз.
Монголын эдийн засагт ерөнхийдөө Тавантолгойг хэн авах вэ гэсэн улс төр, эдийн засгийн бүлэглэлүүдийн талцал, зодоон л болох болсноос хэний тархийг ухаж, ямар мэдлэг, ямар ноу-хау гаргаж ирэх талаарх эрүүл өрсөлдөөн алга байгаа нь худлаа биш. Ийм болохоороо Монгол ядуу байдаг ч биз.
Бизнесийнхнийг шинжлэх ухаан руу татах бодлогыг төр засгаас төлөвлөгөөтэйгөөр хэрэгжүүлэх хэрэгтэйг шинжлэх ухаан ч өөрөө шахаж, эрдэмтэд ч хэлж шаардах болсон билээ. Өнөөдрийн хувьд эрдэмтдийн бүтээлийн 90 хувь нь захиалагчгүй, худалдан авагчгүй, зөвхөн өөрийн хүсэл сонирхлоор хийгдэж байгааг салбарынхан ярьцгаадаг. Сайн бүтээл туурвилаа гэхэд их сайндаа л төр одон медалиар шагнаад өнгөрдөг. Гэвч энэ бол мэдлэгийн эдийн засгийг дэмжсэн бодит дэмжлэг биш ээ гэдгийг эрдэмтэд инновацийн чуулга уулзалтын үеэр ярьж байсан юм.
Яг үнэндээ бол Тавантолгой, Оюутолгойг ашгийг хэзээ, хэн хүртэх вэ гэсэн улстөржилт л өрнөж байгаа нь энгийн иргэдэд ч ойлгомжтой болсон. Үүний цаана хэдэн арван тэрбум доллар яригдаж буй гэдэг нь нэгэнтээ тодорхой.
Үнэндээ Тавантолгойг “Готов нь авна уу, Шадав нь авна уу” хамаагүй. Гол нь стратегийн томоохон ордуудаа эдийн засгийн эргэлтэд оруулах ил хүслийн ард мэдлэгийн эдийн засгийг дэмжих, мэдлэгийг үйлдвэрлэл болгоход анхаарах ёстой болов уу. Уул уурхайгаа ч, уураг тархиа ч ухаж баяжъя.
Уул уурхайгаас гарч байгаа баялгаа угааж, баяжуулж, боловсруулах чадалтай үйлдвэржсэн Монгол болоход уураг тархиа ашиглаж яагаад болохгүй гэж. Монголчууд алтаа ч, тархиа ч адилхан экспортлох цаг болсон биш үү.
Ж.ЭРХЭС
Эх сурвалж: "NEWS WEEK" сонин
Өчигдөр 13 цаг 54 минут | |
Өчигдөр 12 цаг 35 минут | |
2015 оны 5 сарын 23 | |
2015 оны 5 сарын 22 | |
2015 оны 5 сарын 22 |
1 цаг 12 минутын өмнө |