Хүлээн авах ёслолын ажиллагааг нүдээр үзсэн нэгэн "1928 оны үед “Сэрэлт” кинон дээр хүүхдүүд “чийчаан” гээд ором машин дагаж хуйлардаг шиг л юм болсон” хэмээн ёжилж байх юм. Манай дарга нар өмнө нь Боинг онгоцонд сууж үзсэн үү? гэвэл үзсэн. Албан томилолт гээд орон орноор л аяладаг хүмүүс. Чухам өөрийн юм гэхээр ондоо санагддаг бололтой сандал, суудалд нь гар хүрч, сайхныг нь шагширан зургаа татуулж байсан. Ерөнхий сайд Н.Алтанхуяг болон салбарын сайд нар нь шинэ онгоц хүлээн авах ёслол дээр ирэх ньэнгийн үзэгдэл. Гэтэл Шадар сайд Д.Тэрбишдагва, УИХ-ын дэд дарга Л.Цог, Эрүүл мэндийн сайд Н.Удвал, Сангийн сайд Ч.Улаан, Эдийн засгийн хөгжлийн сайд Н.Батбаяр, ЗГХЭГ-ын дарга Ч.Сайханбилэг, УИХ-ын гишүүн О.Баасанхүү, УИХ-ын гишүүн С.Бямбацогт гээд нам намын төлөөлүүд хатуухан хэлэхэд хонь хурга шиг нийлжээ. Шинэ Боинг дотор орж сандал, суудлыг барьж үзэн эгээл хүүхэд шиг аашлах нь сонихон.

Үүнээс гадна манай дарга нар нүд гялбам шинэ онгоц дээр Монгол Улсын далбааны соёмбыг буруу талд нь зурсныг төдийлөн анзаараагүй бололтой. Дуучин Д.Хаянхярваа энэ алдааг нь гярхайгаар ажиглан шүүмжлэхэд МИАТ компанийнхан алдаагаа засна гэдгээ амласан юм. Ер нь энд тэндхийн уулзалт, цуглаан дээр манай улсын далбааны соёмбо нь буруу талдаа гарсан байдгийг анхаарууштай.

Харин тэр хооронд “Монгол Улсын хууль тогтоомжийг 2016 он хүртэл боловсронгуй болгох Үндсэн чиглэлийг батлах тухай” УИХ-ын тогтоолын төслийн анхны хэлэлцүүлгийг хийх эсэхийг хэлэлцэх чухал хурлын танхим хов хоосон. Ирсэн цөөн хэдэн гишүүд ирц хүрээгүй тул чухал асуудлыг үл тоосон “ангийхан”-даа бухимдаад гарч одсон. А.Тлейхан гишүүн "Ийм чухал асуудлыг хэлэлцэхэд холбогдох яамдын сайд, ядаж газрын дарга нарыг оролцуулж байж хуралдааныг явуулах ёстой” гэв.